Alimus háldahusriekti dohkkehii sulaid beali sámedikki válgalogahallamii čuohcci váidalusain

Julkaistu 30.9.2015

Alimus hálddahusriektái bohte áigemearis 24.8. – 17.9.2015 oktiibuot 182 váidalusa, mat čuhce sámedikki stivrra mearrádussii orrut dohkketkeahttá váidaleddjiid jagi 2015 válgalogahallamii. Alimus hálddahusriekti dohkkehii váidalusain 93.

Dasa lassin sámedikki stivra ozai logi jagi 2011 válgalogahallamii merkejuvvon olbmo buohta iežas mearrádusa burgima. Alimus hálddahusriekti hilggui burginohcamuša.

Alimus hálddahusriekti gulai váidalusaid geažil sámedikki stivrra ja váidaleddjiid ja gieđahalai áššiid spiehkastatjođánis áigedávvaliin. Čovdosat addojuvvoje gaskavahku 30.9.2015.

Alimus hálddahusriekti boste mearrádusaid váidaleddjiide sihke sámedikki stivrii ja válgalávdegoddái. Mearrádusat doaimmahuvvojit gaskavahku áigge maiddái šleađgaboasttain buohkaide, geaid šleađgaboastačujuhus lea alimus hálddahusrievtti dieđus. Miehtemielalaš mearrádusa oažžuide ilmmuhuvvo maid telefuvnna bakte.

Jienastanriekti lea sápmelaččain, geat leat váldon válgalogahallamii dehe geat leat ohcalan ieža válgalogahallamii ja ovdanbuktet alimus hálddahusrievtti mearrádusa jienastanrievttisteaset.

Miehtemielalaš mearrádusainis alimus hálddahusriekti geatnegahttá sámedikki válgalávdegotti merket jearaldatvuloš váidaleaddji jietnaválddálažžan válgalogahallamii. Sámediggeválggaid áigemuddu lea 7.9. – 4.10.2015.

Dieđáhusa čuovusin leat njeallje jahkegirjemearrádusa, maiguin váidalusat leat dohkkehuvvon ja okta eará mearrádus ovdamearkan hilgojuvvon váidalusas.

Oktavuohtadieđut:
Päivi Musakka, gulahallanhoavda 050 341 1347

KHO:2015:145

Čoavddusčilgehus jahkegirjái

Sámediggeválggat – Merken válgalogahallamii – Sápmelašvuohta – Sámegiella – Buolvaduvvan lappalaččas – Sápmelašvuhtii buohtastuvvan – Iešidentifikašuvdna – Sápmelaš eallinvuohki

Jahkegirjenummár AHR:2015:145

Addinbeaivi 30.9.2015

Fuorkánummár 2601

Diáranummár 2740/3/15

Sápmelažžan iežas adni váidaleaddji, guhte lei arkiivaeiseválddi addin duođaštusa mielde jagi 1739 eanangirjái lappalaččaid jovkui merkejuvvon olbmo maŋisboahtti ja guhte lei jáhkehahtti ládje čájehan iežas sápmelaš sohkaduogáža ja nanu oamastuvvama sihke priváhta- ja ámmáteallimisttis sámegillii ja sámi kultuvrii, galggai ollislaččat árvvoštaladettiin gehččot lean sámedikkis addojuvvon lága 3 §:s dárkkuhuvvon sápmelaš.

Suoma vuođđoláhka 17 § 3 momeanta ja 121 § 4 momeanta

Láhka sámedikkis 1 ja 3 §, 5 § 2 momeanta, 6 §, 26 b § 1 ja 3 momeanta

Hálddahusláhka 31 § 1 momeanta

Vuoigatvuohtaministeriija ásahus meannudeamis, mii galgá doahttaluvvot sámedikki válggain, 2 § 1 momeanta

Siviila ja politihkalaš vuoigatvuođaid oktasašsoahpamuša 27 artihkal

Ovttastuvvan našuvnnaid juohkelágán nállevealaheami jávkadeami soahpamuš

Eurohpa olmmošriektesoahpamuš 13 artihkal ja 12. lassibeavdegirji

Álbmotlaš veahádagaid suodjaleami rápmaoktasašsoahpamuš

Riikkaidgaskasaš bargoorganisašuvnna álgoálbmotsoahpamuš

Ovttastuvvan našuvnnaid julggaštus álgoálbmogiid vuoigatvuođain 5, 8, 33 ja 46 artihkal

Gč. ja vrd. AHR 1999:55, 2003:61 ja 2011:81

KHO:2015:146

Čoavddusčilgehus jahkegirjái

Sámediggeválggat – Merken válgalogahallamii – Váhnema sápmelašvuohta –

Váhnen merkejuvvon ovddit válggaid válgalogahallamii – Burginohcamuš

Jahkegirjenummár AHR:2015:146

Addinbeaivi 30.9.2015

Fuorkánummár 2602

Diáranummár 2747/3/15

Váidaleaddji, guhte lei ilmmuhan iežas atnit sápmelažžan ja gean eadni lei merkejuvvon jietnaválddálažžan sámedikki válggain, galggai sámedikkis addojuvvon lága 3 §:a 3 čuoggá vuođul merkejuvvot jietnaválddálaš sápmelažžan válgalogahallamii.

Láhka sámedikkis 3 §, 23 § 1 momeanta, 23 a § 1 momeanta, 26 b § 3 momeanta

Vuoigatvuohtaministeriija ásahus meannudeamis, mii galgá doahttaluvvot sámedikki válggain, 2 § 1 momeanta

KHO:2015:147

Čoavddusčilgehus jahkegirjái

Sámediggeválggat – Merken válgalogahallamii – Sápmelašmeroštallan – Ollislaš árvvoštallan – Sápmelašvuhtii buohtastuvvan – Iešidentifikašuvdna – Sápmelaš eallinvuohki

Jahkegirjenummár AHR:2015:147

Addinbeaivi 30.9.2015

Fuorkánummár 2603

Diáranummár 2757/3/15

Sápmelažžan iežas adni A lei ovdanbuktán arkiivaeiseválddi duođaštusa, man mielde son lea jagi 1825 eanangirjái merkejuvvon lappalačča maŋisboahtti. Son lei dasa lassin ovdanbuktán čilgehusa das, ahte su áhči ja eatni beale máttarváhnemat ledje merkejuvvon Anára sápmelaččaid bearaškartotehkkii. Priváhtaolbmo addin duođaštusa mielde váidaleaddji jagi 1907 riegádan eadni lei oahppan anárašgiela vuosttaš giellanis ja namuhuvvon giella lei leamaš bearraša ruovttugiella. Duođaštusa addi muitalii leamašan unnabártnážin mielde bearraša eallimis, daningo son lei fuolki, ja muitán hupman dalle anárašgiela váidaleaddji áhkuin ja ádjáin. Ovdamearkka dihte guliid namat ledje daddjon anárašgillii.

Alimus hálddahusriekti geahčai, ahte priváhtaolbmo addin duođaštusa vuođul ledje nanu čujuhusat dasa, ahte váidaleaddji eatni bearrašis lei hubmon sámegiella aŋkke muhtin muddui. Váidaleaddji ii ovdanbukton duođaštusa vuođul goitge sáhttán merkejuvvot sámedikki válgalogahallamii duššefal sámedikkis addojuvvon lága 3 §:a 1 čuoggá ákkain. Váidaleaddji ii sáhttán merkejuvvot maid njuolga sámedikkis addojuvvon lága 3 §:a 2 čuoggá vuođul. Ovdal namuhuvvon giella- ja buolvaduvvanáššit sihke váidaleaddji ovdanbuktin čilgehus iežas sápmelaš eallinvugiin ja buohtastuvvamis sápmelašvuhtii váikkuhe goitge ollislaš árvvoštallamis dađi lági mielde, ahte váidaleaddji gehččui deavdit sámediggelágas addojuvvon lága 3 §:s dárkkuhuvvon sápmelašmeroštallama.

Láhka sámedikkis 1 ja 3 §

Vrd. AHR 2003:61 ja AHR 2011:81

KHO:2015:148

Čoavddusčilgehus jahkegirjái

Sámediggeválggat – Merken válgalogahallamii – Sápmelašvuohta – Sámegiella – Virgeduođaštusa merken “Lappi" – Áhku eadni

Jahkegirjenummár AHR:2015:148

Addinbeaivi 30.9.2015

Fuorkánummár 2604

Diáranummár 2803/3/15

Sápmelažžan iežas adni nuppástusohcci A lei ovdanbuktán čilgehusas jagi 1880 riegádan áhku eatni vuosttašin ohppojuvvon gielas viurgeduođaštusa, mas dán eatnigiellan lei merkejuvvon "Lappi". Alimus hálddahusriekti geahčai, ahte virgeduođaštusa merkema vuođul áhku eatni vuosttašin ohppojuvvon giellan galgá atnit sámegiela ja ahte A:a eadni livččii dákko bakte sáhttán merkejuvvot sámediggeválggaid válgalogahallamii. Dán geažil A galggai sámediggelágas addojuvvon lága 3 §:a 1 ja 3 čuoggá vuođul adnot sápmelažžan ja son galggai merkejuvvot sámediggeválggaid válgalogahallamii.

Láhka sámedikkis 3 § 1 ja 3 čuokkis

Hálddahusláhka 31 § 2 momeanta

Muu päätös 2709/2015

Sivun alkuun |