AHR lii hilgom sämitige vaaljâlävdikode kuoddâlmijd

Julkaistu 24.10.2019

Alemus haldâttâhriehti lii onne adelem čuávdusijdiskuin hilgom sämitige vaaljâlävdikode kuoddâlmijd, main váttojii meddâlistemnáál alemus haldâttâhrievti porge-čohčâmáánust toohâm miärádâsâid, moiguin vaaljâlävdikode nk. jiešvuoigimmiärádâsah komettuvvojii já meddâlistuvvojii.

Sämitige vaaljâlävdikodde lii jieijâs kuoddâlmist páhudâm, et alemus haldâttâhriehti lâi monâttâllâm puástud iärrás lasseen toin aggáin, et AHR ij lamaš kuullâm vaaljâlävdikode ääšist ollágin tâi kuullâm lâi tábáhtum tuše vaidâleijei riehtijotteemkolovátámâšâi uásild.

Alemus haldâttâhriehti páhudij, et vaaljâlävdikodde ij lamaš kuoddâlmist uáivildum vaidâlemaašijn ääšiuásálâš ige koččâmušâst puáhtám leđe vaaljâlävdikode čujottem haldâttâhlaavâkevttimlaavâ 59 § 1 moomeent 1 saajeest uáivildum kuullâmfeilâ. Sämitige vaaljâlävdikode kuullâm lâi lamaš meid haldâttâhlaavâkevttimlaavâ 36 § 1 momentist uáivildum naalijn taarbâšmettum.

Ivij 2011 já 2015 alemus haldâttâhrievti miärádâsâiguin sämitige vaaljâluvâttâlmân lasettum persovneh, mooid kuoddâlmeh lohtâšuvvii, pisoh ain-uv vaaljâluvâttâlmist.

Eres miärádâs 5019/2019

Sämitiggevaaljâi vaaljâluvâttâlmân merkkiimân kyeskee kuoddâlem

Adelempeivi: 24.10.2019

Vuorkkimnummeer: 5019

Diaarinummeer: 4607/3/19, 4609/3/19, 4610/3/19, 4612/3/19, 4613/3/19, 4614/3/19, 4615/3/19, 4617/3/19, 4618/3/19, 4619/3/19, 4621/3/19, 4622/3/19, 4623/3/19, 4624/3/19, 4625/3/19, 4626/3/19, 4627/3/19, 4628/3/19, 4629/3/19, 4630/3/19, 4631/3/19, 4632/3/19, 4633/3/19, 4634/3/19, 4635/3/19, 4636/3/19 ja 4637/3/19

ECLI-tubdâldâh: ECLI:FI:KHO:2019:T5019

Äšši Sämitiggevaaljâi vaaljâluvâttâlmân merkkiimân kyeskee kuoddâlem

Occee Sämitige vaaljâlävdikodde

Miärádâsah, kiäid ucâmuš kuáská

Alemus haldâttâhrievti miärádâsah

6.9.2019 vuorkkimnumereh 4005 – 4028 já

17.9.2019 vuorkkimnumereh 4176 – 4178

kiäin persovnij A – Å vaidâlusah sämitige vaaljâlävdikode 1.7.2019 toohâm jiešvuoigimmiärádâsâin láá tuhhiittum. Sämitige vaaljâlävdikode toohâm vaidâlemvuálásiih miärádâsah láá komettum já meddâlistum.

Ašij oovdeb kieđâvuššâm

Tääl koččâmušâst leijee 27 persovnid láá Alemus haldâttâhrievti 30.9.2015 adelem laavâvuáimásij miärádâsâiguin merkkejum sämitige vaaljâluvâttâlmân.

Sämitige vaaljâlävdikodde lii 1.7.2019 tohhum jiešvuoigimmiärádâsâidiskuin meddâlistám tääl koččâmušâst leijee persovnijd sämitige vaaljâluvâttâlmist.

Alemus haldâttâhriehti lii 5.7.2019 adelem miärádâsâidiskuin hilgom sämitige haldâttâs ucâmušâid, moh kuoskii toi 30.9.2015 adelum miärádâsâi raččomân, moh kyeskih tääl koččâmušâst leijee persovnij vaaljâluvâttâlmân merkiimân.

Alemus haldâttâhriehti lii 6. ja 17.9.2019 adelem miärádâsâidiskuin komettâm já meddâlistám sämitige vaaljâlävdikode 1.7.2019 toohâm miärádâsâid, já nuuvtpa tääl koččâmušâst leijee persovnijd kalga toollâđ sämitige vaaljâluvâttâlmist. Riehtijotteemkoloi sajanmäksimân kyeskee vátámušah láá iänáážin hilgum, mut sämitige vaaljâlävdikodde lii kenigittum sajanmäksiđ vaidâleijei riehtijotteemkoloid alemus haldâttâhrievtist kuáhtulâžžân arvâlum 150 – 496 euro summijn, uásild ájánemriäntuidiskuin, tondiet ko AHR árvuštâllâm mield riehtijotteem lii šoddâm vaaljâlävdikode feeilâst, já ko váldá vuotân alemus haldâttâhrievti miärádâsâi loppâpuáttus, te ličij epikuáhtulâš, jis riehtijotteemkoloh šodâččii ollásávt vaidâleijei jieijâs táppun.

Kieđâvuššâm alemus haldâttâhrievtist

Sämitige vaaljâlävdikodde lii teehi 26.9.2019 puáttám kuoddâlmist vaattâm tääl koččâmušâst leijee alemus haldâttâhrievti 6. já 17.9.2019 adelem miärádâsâi meddâlistem.

Vátámušâi toorjân lii celkkum iärrás lasseen čuávuvâš:

Alemus haldâttâhrievti čuávduseh láá adelum jiešvuoigimmiärádâs tahhee kulâhánnáá já vaidâlusah iä lah adelum toos tiättun. Alemus haldâttâhriehti ij lah kuullâm monnân iärráskin sämitige toimâorgaan. AHR monâttâllâm lii luávkkám taid vuáđujurduid ääšiuásálii kulâmist já uásipelij oovtâviärdásâšvuođâst, maid kalga čuávvuđ vuoigâdvuođâlii riehtijotemist. Miärádâsâid kalga ton keežild meddâlistiđ já vuosâsajasávt haldâttâhlaavâkevttimlaavâ 59 § 1 moomeent 1 saje keežild.

Sämitige vaaljâlävdikode tâi haldâttâs kulâhánnáá kyeđđim lii meid lamaš haldâttâhlaavâkevttimlaavâ 59 § 1 moomeent 2 saajeest uáivildum eres monâttâllâmfeilâ. AHR čuávduseh láá adelum haldâttâhlaavâkevttimlaavâ 36 § 1 já 2 momentij vuástásii monâttâlmist. AHR ličij kolgâm haahâđ ciälkkámuš jiešvuoigimmiärádâsâi tahhein "peic jis tot lii taarbâšmettum", já ličij lamaš tárbu pivdeđ ciälkkámuš meid sämitige haldâttâsâst. Jis AHR ličij annaam kulâhánnáá kyeđđim taarbâšmettumin, tot ličij kolgâm vuáđustâllâđ laavâ spiehâstâhnjuolgâdus heiviittem ađai kulâhánnáá kyeđđim.

Occee čuujoot oovdeb kuoddâlmân, mii lii peividum 20.8.2019. Taan kuoddâlmist uáivildum čuávdusijd heemâd meid uđđâ vuoigâdvuođâlii riehtijotteem luávkkám. Čuávduseh láá adelum tast maŋa, ko Yleisradio 8.8.2019 sahhiittâlmist AHR president Kari Kuusiniemi eeđâi, et AHR lâi ton räi adelâm jiešvuoigiimân kyeskee vaidâlusâin 16 miärádâssâd já AHR:st lijjii joođoost suullân 56 vaidâlussâd. Sun joođhij já lasettij tállán čuávuvâžžân: "toi uásild lii čielgâs, et täid ulmuid kalga macâttiđ vaaljâluvâttâlmân" (sahhiittâlmist 10 miinut peht). Ciälkkámušâinis Kuusiniemi munedij tuámustoovlist joođoost leijee vaidâlemašij loppâpuáttus taavijn, mii luávkkái ääši kieđâvuššee tuámárij sorjomettumisvuođâ já pelettesvuođâ tâi aainâs-uv tast ääšiuásálijd já almosviehân šaddee mielâkove AHR tááiđuin kieđâvuššâđ vaidâlusâid vuoigâdvuođâlii riehtijotteem vuáđujurduid kunnijâtmáin. Luávkkám puáhtá tivvoođ tuše meddâlistmáin taan kuoddâlmist uávildum čuávdusijd, kulâmáin sämitige vaaljâlävdikode já máhđulávt sämitige sehe turviimáin vaidâlusâi kieđâvuššâm iästuttes olmoošjuávhust.

Meddâlistemnáál tattum čuávdusijnis AHR lii meridâm vaaljâlävdikode sajanmäksiđ vaidâleijee riehtijotteemkoloid. Vaidâlem keežild AHR raijij kuullâđ vaaljâlävdikode tuše riehtijotteemkoloi sajanmäksimân kyeskee vátámâšâin. Taat čáittá, et vaaljâlävdikode ij lah finnim vuoigâdvuođâlii riehtijotteem. AHR lii miärádâsâidiskuin já ciälkkámušpivduinis páhudâm, et ton ulmen ij lah lamaš kieđâvuššâđ ääši haldâttâhlaavâkevttimlaavâ já vuoigâdvuođâlii riehtijotteem vuáđujurdui miäldásávt.

Ko kuoddâlem árvuštâlmân AHR:st lohtâšuveh koččâmušah AHR oovdeb miärádâsâi merhâšuumeest sämitiggelaavâ 3 § heivitmist, puoh AHR jesâneh, kiäh láá uásálistám čuávdusáid, main 2011 tâi 2015 meriduvvojii persovneh väldimnáál vaaljâluvâttâlmân, tâi majemustáá syeinimáánust 2019 adelum tiei miärádâsâi račohánnáá kyeđimân kyeskee čuávdusáid, tâi čuávdusáid, main láá komettum vaaljâlävdikode jiešvuoigimmiärádâsah, tâi čuávdusáid, moh kyeskih tiein miärádâsâin jo tohhum kuoddâlmáid, láá ääšist iästuliih. Iästulâšvuođâ kalga árvuštâllâđ čovgâdávt meid ton keežild, et AHR lii president Kuusiniemi mediaciälkkámušâi keežild sajaidittum almosviehâ čoolmijn sämitige já ton vaaljâlävdikode vyestipeellin.

AHR monâttâllâm luávkkáá aalmugvuoigâdvuođáid já poolitlijd vuoigâdvuođáid kyeskee almossopâmuš (KP-sopâmuš) 14 artikla 1 pittáást tuárvejum vuoigâdvuođâ oovtâviärdâsâšvuotân tuámustoovlij oovdâst. OA olmoošvuoigâdvuotâkomitea tuhhiittem almolii arvâlus 14 artikla tulkkuumist mield 1 pitá 1 ceelhâ kuáská puoh laavâkevttimtooimân já uulât toos vuoigâdvuođâlii riehtijotteem vuáđutáhádâsâid, nuuvt ko ääšiuásálii kuullâm já täsiviärdásii prosessuallii sajaduv.

Jiešvuoigimmiärádâs komettem miärádâs tahhee kulâhánnáá lii lamaš meid taarbâšmettum já tohhum liijkás huápust. AHR siämmáálágán ääšist 2.8.2019 adelem koskâpuddâsii miärádâs 3584/2019 mield vaidâlusâst ličij lamaš jiešvuoigimmiärádâs olášuttem maŋedeijee vaiguttâs. kulâhánnáá kyeđđim vuáđustâlhánnáá lii meid taan keežild lamaš čielgâ ruossâriijdost haldâttâhlaavâkevttimlaavâ 59 §:in.

Vuoigâdvuođâlii riehtijotteem luávkkáámân čuujoot meid tot, et váldu-uási tääl uáivildum čuávdusijn láá adelum siämmáá äššiulmuu rähtim vaidâlussáid já äššiolmooš lii jieijâs vaidâlemreeivâst iävtuttâm riehtijotteemkoloi meridem riävtui sanktio (ráŋgáštâs) luándulâžžân. Vattum já AHR meridem riehtijotteemkoloh láá lamaš jieškote-uv tábáhtusâin meekaanlávt siämmáástuárusiih, mii čuujoot toos, et AHR ličij tuhhiittâm äššiulmuu iävtuttâs riehtijotteemkoloi meerridmist sanktio luándulâžžân.

Jiešvuoigimmiärádâsâst lii vuáđustâllum tot vuoigâdvuođâlâš stelliittâs, mast vaaljâlävdikodde heiviittij laavâ sämitiggeest 26 a § miäldásii toimâvääldi tiätu persovnij meddâlistmist vaaljâluvâttâlmist. Ko AHR lii čuávdám vaidâlusâid huáppoin já jiešvuoigimmiärádâsâi tahhee kulâhánnáá, te miärádâsah láá äššiubâlâšvuođâ váduhisvuođâ já maaŋgâpiälásâšvuođâ keežild šoddâm siskáldâsâidis peeleest puástud. Jiešvuoigimmiärádâsah láá komettum ton konstruktio vuáđuld, et AHR 5.7.2019 adelem čuávdus AHR 2019:90 leđe račohánnáá sämitige ive 2011 já 2015 vaaljâluvâttâlmáid kyeskee ovdebáid čuávdusijdis OA olmoošvuoigâdvuotâkomitea 1.2.2019 olgosadelem ohtâlâsvaidâlemmiärádâsâin aašijn 2668/2015 já 2950/2017 huolâhánnáá oroččij čäittimin, et tiein vaaljâluvâttâlmijn ličij čannee riehtivyeimi koskâvuođâst ive 2019 vaaljâluvâttâlmân, sämitige vaaljâlävdikode ovdâsvastuu já kenigâsvuođâ ive 2019 vaaljâluvâttâllâm amnâstuvlii laavâmiäldálâšvuođâst lappâd. Konstruktiost láá feeilah ucâmušâst tärhibeht kovvejum taavijn.

Kenigâsvuođâlâžžân heiviittiđ riehtioornig tagarin ko tot lii vyeimist ive 2019, vaaljâlävdikodde lii kiävttám sämitiggelaavâ 26 a § miäldásii jiešvuoigimvääldi. KP-sopâmuš aalmugijkoskâsii kocceemorgaanist finnejum čuávduseh, main lii páhudum, et ive 2015 vaaljâluvâttâllâm (já epinjuolgâlávt ive 2011 vaaljâluvâttâllâm) lii siskeldâm olmoošvuoigâdvuotâluávkkáámijd, láá čáittám, et motomeh personeh láá epivuoigâdvuođâlávt valdum njuolgist 2015 vaaljâluvâttâllâm vuáđuld ive 2019 vaaljâluvâttâlmân tâi et merkkiimist vaaljâluvâttâlmist lijjii mudoi feeilah. Jiešvuoigiimân kyeskee laavâsaje ij siskeeld raijiittâsâid, mon mield vuoigimtoimâväldi kuoskâččij tuše teknisluándusijd feeilâid. Haldâttâs iävtuttâs tärhis vuáđustâlmij ovtâskâs celkkuin ij lah puáhtám čannee vuovvijn miäruštâllâđ lahâteevstâ siskáldâs ton kielâhäämi lappâd. Tondiet AHR meddâlistemnáál uccum čuávduseh láá puástud meid jiešvuoigimtoimâvääldi vijđoduv uáinust.

Jiešvuoigimmiärádâsâst lii nubástusuuccâmvuoigâdvuotâ tuámustoovlin já AHR lii ciälkkám, et vaidâlusâst lii jiešvuoigimmiärádâs olášuttem maŋedeijee vaiguttâs. AHR ij tondiet liččii kolgâm summaarisávt komettiđ jiešvuoigimmiärádâsâid tuše toin aggáin, et jiešvuoigim puávtáččij haldâttâs iävtuttâs vuáđustâlmij mield kuoskâđ tuše teknisluándusijd aššijd.

Kuoddâlmist meddâlistemnáál vattum čuávduseh kyeskih persovnáid, kiäi vaaljâluvâttâlmân väldim lii tábáhtum AHR miärádâsâiguin sämitige vaaljâlävdikode já haldâttâs olášuttem ovtâskâslii já vuáđustâllum árvuštâllâm vuástá. Nuuvtpa toh láá OA olmoošvuoigâdvuotâkomitea miärádásâi mield luávkkám sämmilij poolitlijd uásálistemvuoigâdvuođâid (KP-sopâmuš 25 artikla) já vuoigâdvuođâ jieijâs kulttuurân (27 artikla), kuábáš-uv tulkkojum aalmugij jiešmeridemvuoigâdvuođâ (1 artikla) uáinust. Ääši amnâstâhvuoigâdvuođâlâš peeli lii muálkkáá já vaigâd, já AHR ličij kolgâm kuullâđ sämitige vaaljâlävdikode jyehi tábáhtus ovtâskâslij jiešvuođâi čielgim já árvuštâllâm tiet.

Sämitige vaaljâlävdikoddeest láá merhâšittee almolii vääldi kevttim uáivildeijee jiečânâs toimâvääldih njuolgist laavâ mield. Uásist aašijn vaaljâlävdikodde taha sämitige peeleest lopâlijd já olášuttem várás tohálijd miärádâsâid, main vaidâluvvoo njuolgist alemus haldâttâhriävtán. Taat kuáská meid tääl koččâmuš vyelni leijee vaaljâlävdikode jiešvuoigimtoimâvááldán sämitiggelaavâ 26a §:st. Tondiet vaaljâlävdikodde lii tot toimâorgaan, mon AHR ličij kolgâm kuullâđ vaidâlusâi keežild.

Alemus haldâttâhrievti čuávdus

Alemus haldâttâhriehti hilgo ucâmuš

Vuáđustâlmeh

Čuávdusjuávhu iästuttesvuotâ

Haldâttâhlaavâkevttimlaavâ 76 § 1 moomeent já riehtijotteempálgá 13 lovo 7§ 2 moomeent mield tuámmár lii iästulâš kieđâvuššâđ siämmáá ääši tâi ton uási uđđâsist siämmáá tuámustoovlist, jis lii vuáđustâllum aggâ epidiđ, et sust lii áášán munestiällu ton keežild magareh suu oovdeb čuávduseh siämmáá ääšist láá teikkâ monnii eres aagâ keežild.

Kuoddâlmist oovdânpuohtum iästulii juávhu vátámâš keežild alemus haldâttâhriehti pááhud, et tääl čuávdimnáál lii, lii-uv kuoddâlmist meddâlistemnáál vattum miärádâsâid tovâdijn tábáhtum taggaar monâttâllâmfeilâ tâi siskeldeh-uv miärádâsah tagarijd hämifeeilâid, moi keežild taid kolgâččij haldâttâhlaavâkevttimlaavâ 59 § keežild meddâlistiđ. Koččâmušâst ij lah riehtijotteempálgá 13 lovo 7 § 2 momentist uáivildum naalijn siämmáš äšši ko miärádâsâin, maid alemus haldâttâhriehti lii ivij 2011, 2015 já 2019 adelâm sämitiggevaaljâi vaaljâluvâttâlmân kulâmist. Taam ääši čuávdimjuávhu jesâneh iä lah kuullâm meddâlistemnáál vattum miärádâsâi čuávdimjuávhoid já láá mudoi-uv iästuttemeh uásálistiđ taam miärádâs čuávdimân.

Kuoddâlemvuáđustâsah

Haldâttâhlaavâkevttimlaavâ 59 § 1 moomeent mield laavâvyeimi finnim miärádâs puáhtá kuoddâlem keežild meddâlistiđ:

1) jis toos, kiäs äšši kuáská, ij lah adelum tilálâšvuotâ šoddâđ kullum já miärádâs luávkkáá suu vuoigâdvuođâid;

2) jis ääši kieđâvuššâm ääigi lii tábáhtum miinii eres monâttâllâmfeeilâid, mii lii puáhtám čielgâsávt vaiguttiđ miärádâsân; tâi

3) jis miärádâs lii nuuvt epičielgâs tâi vájuvâš, et tast lii šoodâ čielgâsin, maht äšši lii čovdum.

Haldâttâhlaavâkevttimlaavâ 36 § 1 moomeent mield vaidâlemvirgeomâháš kalga haahâđ ciälkkámuš ton haldâttâhvirgeomâháást, mii lii toohâm ääšist miärádâs, peic jis tot lii taarbâšmettum. Siämmáá ceehi 2 moomeent mield čielgiittâs haahâm várás puáhtá pivdeđ ciälkkámuš meid eres virgeomâháást ko 1 momentist uáivildum virgeomâháást.

Ääšist lii koččâmuš tast, lii-uv alemus haldâttâhriehti puáhtám komettiđ sämitige vaaljâlävdikode 1.7.2019 toohâm jiešvuoigimmiärádâsâid toin hámálijn aggáin, et jiešvuoigiimeh iä lah lamaš máhđuliih tast maŋa ko alemus haldâttâhriehti lii čuávdám vaaljâluvâttâlmân kulâmân kyeskee amnâstâhvuoigâdvuođâlijd koččâmušâid jo ovdeláá laavâvuáimásávt. Nuuvtpa kuoddâlmist meddâlistemnáál vattum miärádâsâin já taan miärádâsâst ij lah koččâmuš tast, kiäst lii amnâstâhvuoigâdvuođâlâš vuoigâdvuotâ leđe merkkejum sämitige vaaljâluvâttâlmân.

Sämitige vaaljâlävdikodde ij lah haldâttâhlaavâkevttimlaavâst uáivildum ääšiuásálâš kuoddâlmijn uáivildum vaidâlemaašijn, pic tot lii lamaš miärádâsâid toohâm virgeomâhâš, kiän ciälkkámuššáid heiviittuvvojeh haldâttâhlaavâkevttimlaavâ 36 § 1 moomeent njuolgâdusah siämmáá laavâ ääšiuásálii kulâmân kyeskee 34 § saajeest. Tondiet ko sämitige vaaljâlävdikodde ij lah lamaš vaidâlemaašijn ääšiuásálâš, koččâmušâst ij pyevti leđe haldâttâhlaavâkevttimlaavâ 59 § 1 moomeent 1 saajeest uáivildum kuullâmmonâttâllâm.

Haldâttâhlaavâkevttimlaavâ 36 § 1 moomeent keežild miärádâs toohâm virgeomâháá ciälkkámuš kalga pivdeđ, peic jis tot lii taarbâšmettum. Alemus haldâttâhrievti ive 2015 toohâm vaaljâluvâttâlmân merkkiimân kyeskee miärádâsah láá laavâvuáimásiih, ige toi laavâvuáimásâšvuotân já puoh ääšiuásálijd čannee riehtivuáimán pyevti vaiguttiđ muide ko raččomáin täid alemus haldâttâhrievti miärádâsâid. Miärádâs toohâm virgeomâhâš ij pyevti jieijâs alguin väldiđ tuámustoovli laavâvuáimásávt čuávdim ääši uđđâsist kieđâvuššâmnáál. Täi agâiguin sämitige vaaljâlävdikode ciälkkámuš pivdem vaidâlussáid lii lamaš taarbâšmettum, ige kuoddâlmist uáivildum vaidâlemaašijn lah vaaljâlävdikode kuullâm uásild tábáhtum haldâttâhlaavâkevttimlaavâ 59 § 1 moomeent 2 saajeest uáivildum feilâ. Kuullâm lii puáhtám raijiđ kuoskâđ riehtijotteemkoloi sajanmäksimân kyeskee vátámâšâid. Ko váldá vuotân tom, mii lii ovdeláá páhudum já tondiet ko vaaljâlävdikodde lii toimâm sämitiggeest adelum laavâ miäldásij toimâvaldijguin sämitige peeleest, kuoddâlem čuosâttâhhân leijee vaidâlemaašijn ij lah lamaš tárbu kuullâđ sämitige haldâttâskin. Sämitige vaaljâlävdikode kuoddâlem kalga hilgođ agâtteemmin toi osij ko vaaljâlävdikodde lii čujottâm kulâmân kyeskee feiláid.

Sämitige vaaljâlävdikode jiešvuoigimmiärádâsâi meddâlistmân lohtâšum riehtijotemeh láá šoddâm vaaljâlävdikode feeilâst já alemus haldâttâhrievtist lii lamaš máhđulâšvuotâ meridiđ meddâlistemnáál vattum miärádâsâin šaddee agâi keežild, et vaaljâlävdikodde kalga sajanmäksiđ kuáhtulâžžân arvâlum riehtijotteemkoloid, moh vaidâleijeid láá šoddâm. Alemus haldâttâhriehti ij lah monâttâllâm vuoigâdvuođâlii riehtijotteem vuáđujurduu vuástásávt, pic haldâttâhlaavâkevttimlaavâ 74 § 1 já 2 moomeent miäldásávt.

President Kuusiniemi sahhiittâlmist ij lah lamaš vaiguttâs toos, maht kuoddâlem čuosâttâhhân leijee alemus haldâttâhrievti miärádâsah láá tohhum tâi toos, maht koččâmušâst leijee vaidâlemaašijd lii kolgâm čuávdiđ alemus haldâttâhrievtist. Alemus haldâttâhriehti lii kolgâm toimâđ vuáđudemlaavâ, sämitiggeest adelum laavâ já haldâttâhlaavâkevttimlaavâ njuolgâdusâi sehe vuáhádum riehtivyevi miäldásávt já komettiđ sämitige vaaljâlävdikode toohâm jiešvuoigimmiärádâsâid. President Kuusiniemi ij lah kuullâm tääl koččâmušâst leijee vaidâlemašij čuávdimjuávhoid. Vaidâlusah láá čovdum juávhuin, moh láá čoggâšum alemus haldâttâhrievti sorjâmettumis jesânijn.

Vaidâlemaašijd alemus haldâttâhrievtist kieđâvuštijn ij lah tábáhtum taggaar monâttâllâmfeilâ, mii lii čielgâsávt puáhtám vaiguttiđ miärádâssáid iäge miärádâsah lah nuuvt epičielgâseh tâi vájuvááh, et tain ij šodâččii čielgâsin tot, maht ääših láá čovdum. Kuoddâlemucâmuš toorjân iä lah puohtum oovdân tagareh aagah, moi keežild tom puávtáččij mieđettiđ, ko váldá huámmášumán haldâttâhlaavâkevttimlaavâ 59 § 1 moomeent. Ton keežild ucâmuš kalga hilgođ.

Ääši láá čuávdám riehtineuvoseh Irma Telivuo, Mika Seppälä já Ari Wirén. Ääši oovdânpyehtee Heidi Jääskeläinen.

Ohtâvuotâtiäđuh:
Jaana Lappalainen, proojeekthovdâ, alemus haldâttâhriehti, puh. 050 308 7574, jaana.lappalainen(at)oikeus.fi