Sáhtángo ohcat rievdadusa alimus hálddahusrievttis?

Mearrádusas oažžu váidit dat, geasa mearrádus lea čujuhuvvon dahje gean riektái, geatnegasvuhtii dahje ovdui mearrádus njuolga váikkuha.

Hálddahusrievttis ožžojuvvon mearrádusa mielddusin lea váidinčujuhussan nammaduvvon ráva váidinlohpeohcamuša ja váidaga dahkamis alimus hálddahusriektái. Juos mearrádusas ii oaččo váidit alimus hálddahusriektái, váidingildosis lea muitaluvvon mearrádusas.

Hálddahusrievtti addin mearrádussii oažžu váldonjuolggadusa mielde ohcat rievdadusa váidimiin alimus hálddahusriektái dušše, juos alimus hálddahusriekti mieđiha váidinlobi. Seammá gusto stuorámus oassái márkanrievtti mearrádusain. Váldonjuolggadusas leat leahkimin muhtin spiehkastagat. Ovdamearkka dihtii mánáidsuodjalanlágas meroštallojuvvon servodaga áittardeapmái váldimii guoskevaš hálddahusrievtti mearrádusain sáhttá váidit hálddahusriektái almmá váidinlobi haga.

Alimus hálddahusriektái sáhttá váidit njuolga almmá váidinlobi haga eará áššiid lassin ovdamearkka dihtii stáhtaráđi dievasčoahkkima, Sámedikki, Ålándda eanangotti ráđđehusa ja guovddášvearrolávdegotti mearrádusain.

Váidinlohpi mearkkaša alimus hálddahusrievtti mieđihan lobi váidit hálddahusrievtti dahje márkanrievtti dahkan čovdosis. Alimus hálddahusriekti dutká álggus, divvetgo váidinlohpeohcamušastat lágas ásahuvvon váidinlobi mieđiheami eavttut.

Juos alimus hálddahusriekti ii mieđit váidinlobi, ášši gieđahallan alimus hálddahusrievttis nohká iige alimus hálddahusriekti atte čovdosa áššái, masa váidda čuohcá. Dalle hálddahusrievtti dahje márkanrievtti áššis addin mearrádus oažžu lágafámu.